行政會議早前通過幾間專營巴士公司疫市加價，隨即激起民憤，好多團體要求巴士公司凍結票價。運輸及房屋局局長陳帆早前解畫時大打飯碗牌，話若果唔畀加價，巴士公司2,000員工就要放無薪假、減薪甚或裁員，之但係依家有逾26萬市民失業，市民無錢仲要捱貴交通費，政府就加少少交通補貼算數當幫忙。雖知可加可減機制係只加不減機制，即係日後票價都只會加落去，睇嚟民怨好快大爆發，陳帆點拆彈呢？小心佢都飯碗不保呀！
