政情：臨退休爆響口 公大易名都大 黃玉山擰擰頭
香港公開大學校長黃玉山即將喺月底退休，尋日佢就邀請咗一班傳媒分享過去7年來嘅工作同退休心情。公大校董會早前通過改名為香港都會大學，立法會教育事務委員會早前亦都通過了新嘅中、英文校名。對於有學生同校友話公大無諮詢過佢哋就改名，黃玉山坦言新校名「冇可能令所有人都喜歡」，甚至「都大」起初都唔係佢最理想嘅校名。
公大易名為「都大」後，英文名為Hong Kong Metropolitan University，簡稱暫為「HKMU」。校方唔止一次指出，由於「公開」一詞經常令外界誤以為該校只開辦遙距課程，黃玉山尋日又提到，唔少教授到海外交流，往往都要花唇舌向其他人解釋。校方喺一年多前已開始諮詢大學持份者，最先諮詢學生同校友，因為唔少人提到喺求職時可能會被誤會修讀嘅只係兼讀或遙距課程，因此唔少校友亦期望學校可以重新命名。
之後覺得有活躍向前感覺
黃玉山又話該校收到數百個甚至過千個提名，當中包括香港九龍大學、香港弘仁大學、香港應用大學、獅子山大學、香港紫荊大學等。經過篩選之後，有兩、三個名最理想，再交由校董會決定，「呢個名冇可能令所有人都喜歡，但用用吓可能會覺得唔錯」，佢坦言「呢個都唔係我揀最理想嗰個。」
但佢其後覺得新校名能體現香港係大都會，有活躍同向前嘅感覺，亦唔係只標榜係理工科或文科大學，佢期望今年9月或更早可以採用新校名添！
佢由2014年起擔任公大校長，本月底將結束7年嘅工作，校長一職將由城市大學特別項目總監及化學系講座教授林群聲接任。佢話在任多年見證公大成長，例如由當時只有6,000多名學生，至今增近一倍至逾一萬人，教職員亦由約200人倍增至400人，開新課程、建新大樓及改校名等等。
指國安教育不一定要必修
被問及《港區國安法》列明港府應開展國家安全教育，佢話未有政府官員同佢討論過相關議題，而佢認為本港過去嘅國情教育做得唔夠，年輕人應多了解國家發展，但國安教育唔一定要喺大學成為必修科。
佢在任期內經歷佔領運動及反修例風波，佢認同係社會出問題，但唔能夠完全將問題歸咎於教育，不過教育亦唔係「完全冇問題」。
被問及公大校友、前香港眾志秘書長黃之鋒等身陷囹圄有何感受時，佢話一直都有關心唔同嘅學生，又話經常同學生來往喎。