中環出更：羅致光對打工仔見死不救 被批高智商用錯範疇
疫情令本港經濟大受衝擊，失業率更飆升突破7 %，外界質疑政府推出的政策未能解決失業人士及開工不足市民的燃眉之急。勞工界代表吳秋北尋日狠批政府官僚、勞工及福利局局長羅致光對打工仔見死不救，更嘲IQ高達160嘅羅雖有智慧，但唔係將聰明才智用喺勞工方面嘅工作。
過去唔少政黨都要求政府設失業援助金，而吳所屬的工會亦曾建議推出150億元嘅失業停工津貼，上限每月9,000元、為期半年，但政府未有接納建議。佢直指唔少市民已持續多月失業，山窮水盡，批評政府未有體諒打工仔苦況，認為唔喺推出個人貸款計劃外，設停工津貼係最快解決佢哋燃眉之急嘅方法。
質疑政府過於官僚
吳直指內地喺疫情下推出多項救失業、保就業措施，屬主動作為。相比之下，港府只係等待打工仔求助，批評這種被動處理港人失業問題嘅方式極不妥當，狠斥勞福局一直見死不救，質疑政府過於官僚。
佢質疑羅致光好有智慧，但唔係用喺協助勞工方面嘅工作，又強調現時抗疫猶如打仗，需要當戰時狀態咁看待，如果只係以平常嘅程序處理或以道德風險考慮，難以協助疫情下嘅勞工失業問題。
卓妮