中環出更：傷殘人士旅遊困難重重 劉家倫助圓夢
疫情下封關超過一年，無得去旅行相信大家都好辛苦。其實就算無疫情，有班傷殘人士想去旅行都困難重重。香港傷殘青年協會行政總監劉家倫（David）有舉辦旅行團畀傷殘人士參加，但過程可以話係要過五關斬六將，例如唔係每一款輪椅都可以上飛機、旅遊目的地亦都要有適合嘅交通配套同洗手間畀傷殘人士。咁辛苦，但係傷殘人士仍然好珍惜去旅行嘅機會，點解呢？
David話有時候輪椅唔夠位進入酒店浴缸，令傷殘人士要喺浴缸外沖涼，搞到滲水出房門。但David話身體尚可嘅傷殘人士都會盡力去旅行，因為病情之後可能會令佢地由行動不便變成全身癱瘓，佢哋嘅身體狀況亦不如同齡人，衰老得好快，惟有抓緊每一個機會，好好去看看世界。
賴嘉敏通關最想環遊世界
紫荊青年商會會長賴嘉敏（Susan）都有試過去旅行唔方便嘅經歷，佢去紐約搭地鐵時先發現當地並無電梯或者升降機，嬌小嘅佢難以獨力將行李箱拖上樓梯，好彩有善心嘅當地人出手幫助！Susan話通關嘅話最想去環遊世界，特別想去非洲同埋印度呢啲比較難去嘅地方，到時就會做背包客，方便行動喇！
國際青年商會香港總會會長楊穎琳（Winnie）就分享大學時去加拿大參加辯論比賽嘅經歷，由於當時係冬天落緊雪，Winnie不幸滑倒扭親腳，要入院同埋坐輪椅。Winnie話回想起當時身處外地人生路不熟，仲要受傷行動不便，真係好無助呀！好彩最後Winnie都參加到比賽，叫做完咗個心願。
總會副會長陳森源（Marco）喺澳洲讀高中時就熱衷打籃球，但打得太激烈唔小心拉傷腳筋，坐咗輪椅差唔多一年。Marco話當時居住地方同學校只有15分鐘車程遠，但當地巴士非常疏落，巴士亦都無設施畀輪椅上落，所以佢只好駕駛電動輪椅來回學校。可能就係有呢一年嘅輪椅經歷，Marco經常會留意到畀傷殘人士嘅設施不足，例如商場缺乏輪椅升降台等。
卓妮