政情：借「民意」過橋 陳梓維終願宣誓
政府將要求區議員宣誓擁護《基本法》同效忠香港特區，唔少泛民主派政黨都猶豫不決，繼離島區議員王進洋日前表明會宣誓，油尖旺區議員陳梓維前日都喺社交平台Facebook發文話將會宣誓，之不過又話係街坊認為佢應宣誓，講講吓又自爆有公安部門曾經同佢嘅內地親友約談喎。唔少網民鬧爆，陳梓維嘅做法係借「民意」過橋，仲直斥佢為份糧出賣手足！
陳喺貼文話區內街坊一致認為佢需要宣誓，又提到過去建制派在任時有唔少天價維修事件，同埋其辦事處職員態度惡劣，仲話街坊都深知佢處事認真喎。佢透露，同一時間亦收到大陸親友通知，話有公安部門搵咗佢哋約談，又話相信自己嘅新移民身份已成中共眼中釘，但係佢仍決定會宣誓。唔少網民都有留言批評，又話佢「出賣手足、正契弟」，亦有人嘲諷佢「糧支最緊要」。
工作表現一直受質疑
自上任以嚟陳梓維嘅工作表現一直備受質疑，仲鬧出笑話。就好似喺今年初嗰陣，佢接到街坊投訴後，竟然將個案轉介畀建制派處理，隨即畀網民怒轟其能力有問題。另外佢又曾經因為喺農曆新年假期前，喺Fb上宣布辦事處收爐至初十八先啟市，引起網民熱烈討論。到底係咪真係有街坊想佢宣誓呢？真係不得而知喇！