政情：曾稱唔想被區會薪津限制 王進洋反口話留低宣誓
政府將要求所有現任區議員宣誓擁護《基本法》以及效忠香港特區，令唔少泛民主派區議員舉棋不定喎。離島區議員王進洋態度更係反反覆覆、屢轉口風，上月曾經宣稱將會辭職，之後又改口話「未必唔會宣誓」，最新決定就話會留低宣誓添！
被斥「生人霸死地」
王進洋尋日喺社交網宣布，「最後決定留低，宣誓」。認為留低有多個工具，又話口號雖然係旗幟，但現時而言，都只係其次喎。有「粉絲」留言直指「失望，unfollow（取消追蹤）」。亦有人認為係笑話，鬧佢生人霸死地。
不過，王進洋上月24日喺社交網站講得好口響喎。當時話自己追求珍重而莊嚴嘅抗爭口號同原則，形容係超越對物質嘅追求，所以唔希望被區區4萬蚊，以及虛而不實嘅議席所限制。到本月16日就改口話目前嘅諗法係「辭職佔六成、留低佔四成」，擔心區議員嘅資源會落入對家手上。又話會畀自己3個月時間思考，不過唔知係咪顧及「區區4萬蚊」嘅薪津，迅速就落到決定呢？