中環出更：難復昔日威嚴 張仁良嘆老師難做
十年樹木，百年樹人，老師肩負培育下一代嘅重責，當然值得敬重。不過香港教育大學校長張仁良日前接受恒大傳播學院訪談時，就慨嘆今時唔同往日，指昔日做老師好有威嚴，學生一聽聞老師要見家長就會惶惶不可終日，但時下家庭趨向少子化，老師處罰犯錯嘅學生反而會遭到家長嘅怪責，搞到老師好難做啊！
執教上雖遭受壓力，但張校長認為老師須堅持責任，要有分辨對錯嘅勇氣而唔可以凜於家長嘅無理指摘，應嘗試多同家長及小朋友溝通。雖然老師唔易做，但張校長始終相信做老師唔單止係打份工，更要成為學生嘅榜樣，所以正面嘅人生觀及工作態度、團隊合作精神，以及溝通能力都不可或缺。張校長又提到，香港廿多年來大學教育普及化，年輕人考入大學嘅競爭無疑係少咗，但其實更激烈競爭係留待離開大學校園之後，所以就算得到一紙文憑，都唔保證職場能一帆風順。張校長認為學校同政府要協助青年人做好期望管理，而年輕人自己都要努力，不斷增值，回應社會需求，把握好每個機會。
沈貝嘉：當今教育強調啟發
金紫荊女企家協會副主席沈貝嘉（Anita）既是家長，本身又從事教育，佢認為當今社會好注重民主與平等，以致老師同學生嘅關係，較過往拉近咗好多，況且當今嘅教育理念，係強調引導同啟發，同以往講求傳授與灌輸嘅教學方法係有分別，因此今日做老師，既唔可以再憑權威去壓服學生，亦都不能施行體罰或趕學生出課室等嚴厲手段。Anita話明白到老師總會遇上態度欠佳嘅學生，而佢嘅做法，就係減少對方心儀嘅遊戲或活動嘅機會，從而促使學生自我反省。
九龍樂善堂副主席彭志宏，就認為教育下一代，固然要有良好嘅師資，不過家長嘅身教亦同樣重要，畢竟一個人嘅成長，唔可以完全依賴學校。彭身為3個小朋友嘅爸爸，並唔介意老師話要「見家長」，事關願意抽出課餘時間去同學生家長溝通，其實係老師盡責嘅表現。
卓妮