政情：鄭若驊慣性墊司底 賴死拒讓位
接連兩日有調查機構發布市民對於政府問責班子嘅滿意度調查，佢哋嘅共通點除咗全部局長嘅滿意度或支持度皆錄得負增長外，另一焦點就係被嘲為「避政司司長」嘅律政司司長鄭若驊依舊「墊司底」！有學者同時事評論員都炮轟，鄭幾乎未喺同類調查攞到合格分數，加上管理下屬無方，一早就應該問責下台，唔好賴死唔走、拖慢檢控工作啊。
話說香港研究協會尋日發布市民對特首、司局長及政府滿意度嘅最新評分調查，該調查喺本月8至15日期間進行，訪問對象係1,205名18歲或以上市民。結果顯示，特首林鄭月娥只有1.88分，較2月調查下跌0.02分。至於3名司長方面，鄭嘅評分亦較上次調查下跌0.05分至1.64分，繼續係市民滿意度排名最低嘅司長。至於13名局長嘅評分亦全線下跌，當中被轟抗疫不力嘅食物及衞生局局長陳肇始嘅評分都跌咗0.05分至1.95分。
管治無方 律政人員被揭「暗黃」
對於鄭長期排名榜末，香港理工大學專業及持續教育學院講師陳偉強認為，鄭一早就應該執包袱走人，唔好霸住個位，搞衰本港法治。陳指連續兩個調查都顯示鄭民望「墊司底」，反映市民對佢嘅工作表現極度不滿。
陳又認為市民唔滿意鄭喺檢控反修例案嘅速度太慢之外，近期律政司內涉嫌有「暗黃」嘅檢控人員，故意甩轆放生示威者亦係原因之一。市民會覺得鄭管治無方，對下屬更加係無牙老虎，根本冇人聽佢支笛。陳表示，雖然現屆政府餘下任期唔多，但鄭嘅職位都係重要位置，不可等閒視之，否則可能會拖慢檢控工作。
評論員：陳肇始塞責亦應執包袱
時事評論員陳雲生都話鄭一早應該按問責原則下台喇，因為喺佢嘅印象中，鄭都未試過合格咁話，難以明白鄭點解唔肯退位讓賢。而陳雲生亦指陳肇始嘅評分下跌絕對同佢抗疫不力有關，因為港人一同澳門比較，就會覺得香港無論口罩、疫苗接種同埋防疫措施都搞到立立亂，認為陳肇始都應該問責下台。