中環出更：健身室爆疫始強制戴罩 議員轟政府「仲未瞓醒覺」

形容「火燭先去救火」

議員田北辰質疑政府防疫措施「時鬆時緊」，佢舉例政府去年推出「口罩令」強制市民戴口罩時，健身室並非豁免處所，但上月重開健身室時竟容許使用者唔戴口罩。田又形容現時執法情況似乎只是「火燭先去救火」，質問「仲有咩情況係未爆發而無人知」。

林鄭回應話，政府早前考慮到若要求健身室使用者戴口罩，「係想到佢窒息或有不良反應」；但指現時爆發大型健身群組後，若要容許健身室繼續開業，必須規定使用者戴口罩，又呼籲佢哋「跑得慢啲」。不過田北辰就唔滿意解釋，批評林鄭「仲未瞓醒覺」。

另外，飲食界議員張宇人就指，大量表列處所接近4個月無法營業，促請政府提供更多資助以渡過難關。林鄭話政府已提供4輪防疫抗疫基金，以及財政預算案提出紓困措施，好難承諾再提供另一輪防疫抗疫基金或其他現金補貼；又指目前食肆員工接種疫苗嘅情況不積極，反籲張宇人需加把勁。

卓妮