中環出更：積極投入社區服務 簡陳擷霞得多過失
香港人口老化問題嚴重，地區上對銀髮族嘅支援只會有增無減。博愛醫院主席簡陳擷霞多年來積極參與社區長者服務，佢話除咗可以幫助更多有需要嘅人士，更能了解基層生活情況，直言過去服務嘅經歷係「得多過失」，自己就好似同社會一齊成長咁啊！
至於有何印象深刻嘅探訪長者經歷，簡太就話曾經探訪過一位住喺元朗嘅獨居婆婆，對方因為住得較偏遠，加上疫情下家人較少前來探望，令婆婆覺得自己好似畀屋企人嫌棄而情緒抑鬱，幸好義工團隊夠細心，發現婆婆鍾意針黹縫紉，於是就不時拎啲布料畀佢用嚟縫製購物袋。婆婆有番啲寄託，心情亦變得開朗。簡太嘅夫婿、博愛永遠顧問簡浩秋，都讚許太太過去喺福利及教育服務上不遺餘力，相較之下自己就比較懶，不過都一直喺背後支持太太，仲話即使被稱為「主席先生」都欣然接受喎。
博愛醫院早前獲銀行捐款，得以購置一架「關愛美膳快車」，為居於元朗偏遠鄉郊嘅獨居長者以及有需要家庭提供服務。負責有關服務嘅博愛副主席陳首銘就話，一直都希望為老友記提供更便利嘅服務，例如送飯或者接送佢哋睇醫生。而佢自己有時都會幫手送飯畀長者，形容有啲長者收到熱辣辣嘅飯盒就會好開懷，更有人唔捨得食添啊！佢相信呢類服務需求將來會大增，目前就一邊做一邊摸索，睇吓點樣可以為社區帶嚟更好服務。
周駿達冀更多年輕人入義工團隊
講到義工服務，另一位副主席周駿達就話，一直都希望可以邀請更多元朗區年輕人加入義工團隊，又話佢哋嘅義工多數都會服務番同區街坊，此舉不但令到大家更有照應外，亦可以令社區更和諧團結咁話！
卓妮