政情：公民講場：失業率愈升愈高 羅致光疫苗當水泡

據政府統計處尋日嘅公布，本港最新失業率升至7.2%，達17年來新高！疫情導致百業蕭條，加上政府無意延續保就業計劃，失業情況勢進一步惡化。勞工及福利局局長羅致光，就認為隨着新冠疫苗接種計劃開展，疫情嘅威脅將逐步減退，勞工市場嘅壓力就有望得以紓緩。之不過，疫苗到底係咪抗疫嘅萬應靈丹呢？南美國家智利都有進行大規模疫苗接種，然而該國近日嘅染疫人數竟不跌反升！又睇番本港陸續有人接種疫苗之後身故，專家雖一再強調冇直接關係，但市民已告信心動搖紛紛打退堂鼓，政府依靠疫苗達致「清零」嘅如意算盤，恐怕未必打得響。