政情：曾話辭職都唔宣誓 王進洋改口風
立法會今將首讀《2021年公職（參選及任職）（雜項修訂）條例草案》，一旦修例草案獲得通過，所有現任區議員都要宣誓擁護《基本法》同效忠特區。離島區議員王進洋上月底曾表態，宣稱自己會喺修例後、安排宣誓時自行辭職。之不過，佢尋日接受傳媒訪問時就修改立場，話自己未必唔會宣誓喎！
最遲6月會決定
咁豈不是「今日的我打倒昨日的我」？王受訪時形容自己目前嘅諗法，「比例係辭職佔六成、留低佔四成」，擔心自己作為區議員嘅資源會落入對家手上，又擔心冇咗公職身份嘅話，未來要搵政府部門接洽時會更加吃力。但佢都同時戴番頂頭盔，話會畀自己3個月時間思考，聽多啲街坊意見，最遲6月先會做決定喎。
睇番王上月24日喺Facebook上嘅貼文，佢當時就指自己追求嘅嘢，係一啲珍重而莊嚴嘅抗爭口號同原則，形容呢啲係超越對物質嘅追求，所以唔希望被區區4萬蚊同虛而不實嘅議席所限制喎。咁到底區議員酬津同議席重唔重要？睇怕要等佢作最後決定之後，點樣再去辯解喇！