政情：民政官員鬥法 區會惡人追殺
今屆區議會目前由民主派主導，自上任起一直同政府爭拗不斷，又經常被指喺會上嘅討論超出《區議會條例》所賦職能嘅議題，搞到民政事務總署署長謝小華都好頭痕。深水埗區議員袁海文尋日舉行記者會，指控該區秘書處涉嫌選擇性刪除區議員發言紀錄同錄音內容，質疑有關行為屬違法。民政事務總署晚上發新聞稿反擊，批評有關指控失實，對此表示極度遺憾。
事件涉及去年11月深水埗區議會第6次大會。袁話自己喺該次會議上，曾經要求秘書處修訂上兩次會議嘅紀錄，補回民政事務專員（DO）離場後嘅議員發言紀錄，包括討論前年10月深水埗有的士司機撞傷途人，同有關修改歷史教科書嘅議程。
袁不滿會議通過修訂後，秘書處將經過刪減嘅錄音內容上載到網絡，並冇記錄到有區議員曾提出修訂；又批評秘書處上月向區議員發出第6次會議紀錄嘅初稿當中，稱會上區議員並冇提出修訂，有關會議紀錄獲得通過。
指區會討論事項不符職能
總署尋晚發新聞稿重申，若發現區議會所討論嘅事項不符合區議會法定職能，秘書處將未能就有關項目提供秘書服務，包括撰寫會議紀錄、把相關會議錄音上載至區議會網站等，而秘書處職員同其他政府人員亦唔會出席該部分會議或參與討論相關文件，強調係一貫做法。
新聞稿又指深水埗區議會第4同第5次會議，有內容不符要求，DO已經喺會上多次申明立場，故並冇將內容包括喺相關會議紀錄當中。總署又聲稱第6次大會上並冇區議員提出修訂，袁只係提出加入「增補」段落，而DO喺會上亦已表明即使區議會通過接納「增補」段落，秘書處亦唔會跟進有關紀錄。總署又批評袁喺過去3星期亦冇就初稿提出修訂，而喺尋日區議會嘅會議上亦冇提出修改建議，批評袁作出失實指控，對此表示極度遺憾。
袁亦隨即反駁，形容總署嘅回應係對於篡改區議員喺會上言論一事直認不諱，批評當局不但冇認錯，更企圖隻手遮天，形容做法厚顏無恥、自摑嘴巴。袁又話尋日下晝已就事件報警同落口供，今早會往廉政公署舉報咁話喎。