中環出更：打造國際知名品牌 史立德列4大要素
創業好難，成功打造品牌形象就更難。一個好嘅品牌可以代表公司，街知巷聞。仁愛堂董事局前主席史立德就話，其實香港人要打造一個國際品牌，相比其他國家同埋地區容易，因為香港人人脈眾多，而且屬於開放型社會，並不封閉。
史立德認為，一般消費者會將熟悉嘅品牌同埋產品質素畫上等號。不過，史都坦言冇嘢係容易嘅，要打造一個成功嘅品牌非常辛苦，絕對需要多年嘅時間、充足嘅資金、巨大嘅心血以及獨特嘅設計。
鄭冬生創業撞正沙士 寶貴經驗
香港市務學會榮譽主席陳裕光就指，要令品牌成功「入屋」，深入民心，具備多個元素，包括價錢、地點、環境、人力資源、推廣及產品。陳又指，另一個關鍵就係要保持品牌年輕，喺唔同時期都要不斷改變，以迎合市場嘅變遷。從事飲食業嘅陳裕光又認為，既要做好本地菜式，又需鑽研環球美食，某程度亦反映香港社會文化多元、華洋混雜。
疫情下令企業生存愈嚟愈難，2020香港青年工業家獎得主鄭冬生（John）創立電子科技品牌，發展智能家居用品。John表示創業初期遇上2003年非典型肺炎疫情，零售業大受打擊，但正正就因為有當年嘅經驗，依家面對疫情會淡定好多。John又話自己從小都好鍾意電子產品，時代轉變得快，科技就係推動社會嘅要素，所以捉緊機會入行同埋創業。
被問到打造成功品牌有咩秘訣，John就話最重要都係香港人嘅拚搏精神。佢分享之前到海外公幹，同其他國家嘅客戶以及合作夥伴傾生意嘅時候，更加感受到身在異鄉，自己就係香港嘅代表，一定要爭氣同埋有自信先得啊！
卓妮