針對廢膠問題，10年前政府分階段實施膠袋徵費計劃，雖然初期頗見成效，但近年來堆填區嘅膠袋棄置量顯著回升，尋日消委會亦指出，每日送到堆填區棄置嘅廢塑膠當中，單係膠袋就有700多公噸！呢個現象除咗反映廢膠回收工作之不足，亦同膠袋徵費多年來未有調整有關。隨着港幣嘅購買力不斷萎縮，昔日索取一個膠袋所付出嘅5毫子，今日跌喺條街度都未必有人願意彎腰去執。既然代價係咁微不足道，又點會阻遏膠袋嘅使用同棄置呢？環境局局長黃錦星都應該與時俱進，檢討一下膠袋徵費嘅水平啦。
