政情：官員硬頸 乜都唔聽 諮詢架構淪無牙虎

非指揮角色 作用有限

陳建強係因其牙醫專業而踏上參與公職之路，跟住入埋中央政策組擔任非全職顧問。自言喺港台事務上花咗10年時間，由聽眾做起直至出任港台顧問委員會主席。做過咁多份公職，體會當然好大，而最難忘嘅經歷，亦都離唔開港台。陳指出港台顧問委員會嘅層次唔係太高，只屬處長嘅諮詢架構，若果用足球隊去比喻，班主就係商務及經濟發展局，教練就係廣播處長，委員會只係教練嘅技術顧問。後來有人問佢委員會到底有何作為，點解港台會搞成咁？而佢亦只能同對方解釋，委員會並非指揮角色，只係技術顧問，若果廣播處長唔問委員會，委員會就冇得發揮，所以作用實在有限。佢仲話外界睇到委員會喺舊年大概有7個月時間，成日見到佢出嚟講嘢，正正因為社會嘅聲音太大，委員會唔可以唔出嚟講嘢，而佢亦都好多次提及廣播處長係咪應該出嚟面對公眾，唔好匿埋呢？

可改變世界係「諗多咗」

被問及諮詢委員會嘅意見，政府好少採納嘅現象，陳建強就話由港英政府年代到依家，各個諮詢委員會雖則係向政府提供意見，然而官員本身有固定嘅睇法，若果大家嘅意見南轅北轍，對方係咪聽從，咁就要睇吓你有幾勁嘅睇法。佢話有時都覺得好無奈，儘管睇到問題所在，又向相關官員講述意見，但政府想唔想去跟？又或者跟唔跟到？佢認為立法會議員先至逼到政府去做嘢，而諮詢架構就惟有借助媒體同公眾壓力。佢又話入得諮詢委員會，可以明白政府運作同難處，對從政有用，但如果話入到去可以改變世界，係諗多咗。

雖則講到諮詢委員會嘅作用有限，但陳建強還是抱有期望。當講到依家仲有冇需要開啲乜嘢諮詢委員會時，佢即刻話香港社會係要做諮詢，聽吓年輕人點樣上車置業，若果父母幫唔到嘅話點算好，同問吓租緊樓嘅年輕人，係咪用5.7年輪到公屋就好開心？抑或要買居屋還是私人樓？其實政府針對年輕人嘅計劃有好多，不過錢就使咗，但冇乜人參與，點樣令到資源到位呢？所以要有一個諮詢委員會嚟問吓啲年輕人嘅想法囉。