中環出更：疫監坐到怕 陳家駒避約飲茶食飯
建造業議會舊年12月下旬推出「建造業關愛工地防疫檢測服務計劃」，而該會主席陳家駒尋日所發表嘅網誌，就自爆喺參與自願檢測嘅過程入面，有一個總辦事處嘅同事證實確診，令佢同其他幾位同事都被界定為密切接觸者，要入隔離營隔離，但好彩大家都可以大步檻過咁話。
隔離不忘考察建築技術
之不過，陳喺隔離期間都不忘考察新嘅建築技術，佢話自己揀咗「竹篙灣檢疫中心」接受隔離，目的就係想乘機體驗一下MiC「組裝合成」建築法嘅成品，並期望呢個新技術可以徹底改善香港建造業嘅安全、品質同效率問題。
可能真係坐疫監坐到怕，佢喺文中深有體會咁話檢疫隔離並唔係度假，一個人困喺一間200呎嘅小房間入面一啲都唔好受，又指疫症面前冇強者，話之你係美國前總統特朗普定球王C朗拿度都要跪低，所以都係做好個人防疫最實際，仲話飲茶食飯可免則免喇！
卓妮