中環出更：觀察動物生活 劉志聰：學習生命共融
人類雖然係萬物之靈，但都唔可以漠視地球上嘅動物。保良局同海洋公園最近攜手合辦一項活動，藉住參觀海洋公園所飼養嘅動物，予學生同長者認識生態保育。保良局教育總主任（小學及特殊教育）劉志聰話，觀察唔同種類動物嘅生活，既可增進知識，仲可以體會到一啲人生道理㗎。
劉志聰指今次嘅活動，係由學生所就讀學校嘅校長設計活動細節，其中小一、小二嘅學生將由家長陪同，透過活動培養家庭感情。高年級嘅同學就會透過了解動物習性，明白到嚴寒或者炎熱嘅極端環境，都有動物能夠適應同生存，非常能屈能伸；又會觀察海洋館內唔同魚類共同生活，學習生命共融嘅意義。
至於中學程度嘅同學都有好多活動參加㗎，教育總主任（中學行政）林綺薇（Loretta）指，佢哋會安排同學參觀實驗室，甚至參與解剖海豚屍體，而同學仔都好勇敢，完全唔驚！Loretta話同學本身都有學習相關嘅科目，解剖同埋參觀後亦要向學校提交報告，絕對可以學以致用，唔係玩玩吓㗎！
陳黎惠蓮玩鬼屋感受節日氣氛
保良局副主席陳黎惠蓮，就未必有學生哥咁大膽啦。陳太話試過同保良局嘅小朋友一齊參加萬聖節活動，仲一齊入海洋公園嘅鬼屋玩添！結果佢驚到全程都合埋眼，但可以同小朋友一齊感受節日氣氛，陳太都覺得好刺激好開心啊！佢又話，喺保良局住宿嘅小朋友較少外出，能夠出去海洋公園了解自然生態與動物，呢啲經歷都係教科書唔可以比擬嘅。
除咗教育小朋友愛護生態，海洋公園教育及特別項目執行總監胡琇然（Josephine）就話，海洋公園亦計劃等疫情穩定後，帶一啲小動物，例如雀仔去老人院探訪，同埋會帶一啲植物畀老友記種植，一段時間後再拎返去海洋公園繼續栽種，等日後老友記去海洋公園參觀時，就可以睇番自己曾經照料過嘅植物喇。
卓妮