政情：被翻dead body舊帳 楊岳橋「今朝君體也相同」
前公民黨議員楊岳橋（AY）曾因形容被判監年輕人「因案底而令人生變得更精彩」，而引起社會嘩然。如今佢因涉違反《港區國安法》而喺收押所還押，繼喺收押所中被民主派人士嘲諷「人生夠精彩未？」後，前香港民族黨召集人陳浩天前日都喺Facebook貼文，批評AY過去踩住本土派嘅「dead body」喺台上慷慨陳詞，直言坐過監「人生更精彩」嘅「手足」，今日講句「今朝君體也相同」都唔過分，仲話香港今日搞成咁，根本就係班尸位素餐嘅政客所造成喎。
話說AY喺2016年參選立法會時，話如果有人想搞香港司法系統就要「Over my dead body！」當時已有唔少網民鬧爆佢係「政棍」，即使認衰都無補於事。
曾指案底令人生更精彩
陳喺貼文中話覺得當年畀AY踩住嘅「dead body」、坐過監「人生更精彩」嘅手足，今日講句「今朝君體也相同」一啲都唔過分。佢又批評「泛民黃絲對住本土派落井下石，又有邊個叫人唔好笑，唔好落井下石？」最後陳仲叫大家唔好問佢有乜做，話「時機、機會一次又一次畀班政棍斷送，呢一刻冇咩好做，除咗搵嘢笑吓之外」。睇嚟AY喺未來嘅日子都會成為被恥笑對象啦！