中環出更：觀音借庫額大縮水 譚健業：最緊要有關照
為求新一年事事亨通，好多人都會趁住觀音開庫嘅日子走去借番筆，手頭鬆動自然覺得明天會更好。多年來都係觀音「債仔」嘅九龍樂善堂當年委員譚健業，今年得到嘅觀音借庫額只得一億二千萬，同舊年9億相比真係少一大截，莫非市道不景就連觀音都謹慎咗？抑或反映經濟陷於通縮？
譚健業話觀音借庫雖則着眼於財運，但亦關乎善信嘅健康同際遇，只要觀音繼續關照，借多借少都只係一堆數字啫！因應疫情，今年多間廟宇嘅觀音開庫都有特別安排，如東華三院轄下6所廟宇，善信可以透過網上登記，院方嘅代表就可以代為借庫。譚健業本來已做網上登記，但開庫當日佢睇電視直播，見紅磡觀音廟容許善信入內，於是親赴現場借庫以表敬誠。至於入廟嘅衣着，有冇因應自己生肖而穿上今年所屬嘅幸運色呢？佢話無，因為佢發覺同一生肖嘅流年運程，唔同嘅玄學家都有唔同嘅見解，與其言人人殊莫衷一是，不如保持平常心，信自己仲好啦！
王賢訊：仔女求學 好重視文昌
已經上契畀觀音嘅名媛朱穎詩（Vincci），就喺借庫當日到新界某觀音廟做義工。因應疫情，觀音廟需額外人手以實施人流管制同處理雜務，而Vincci嘅工作就係清理線香燃點後嘅「香雞」。雖然只係短短幾個鐘，但由於香爐嘅溫度頗高，佢必須戴上皮革勞工手套以做好防護，儘管工作並不輕鬆，但佢話作為觀音嘅契女，服務善信係應有之義。
至於Vincci嘅夫婿，仁濟醫院前主席王賢訊就話家人雖與觀音結緣，但佢亦好重視文昌，原因係仔女處於求學階段，家長都想文昌高照之外，仲有就係文昌亦涉及一切文書事務如商業合同，對於商人而言十分重要。倘得財星但欠缺文昌，等如有錢做生意但合同有漏洞，結果都係得個吉。
卓妮