現時食肆日常營運嘅開支當中，租金佔咗好大部分。疫情之下，政府雖呼籲業主與業界共度時艱，但願意下調舖租者實在少之又少。香港餐飲聯業協會會長黃家和就坦言，呢段時間有好多舖頭因為支持唔住而倒閉，就算旺區都不能幸免，導致整體租金向下調。
粗略估算由疫情開始至今，過往一年店舖租金平均回落20%以上，部分跌幅甚至更大。不過話雖如此，租金仍然佔整體營運成本嘅比重都頗大，促請業主或者大財團，真係能夠減租或者免租咁話。
黃提到，儘管政府呼籲業主減租共度時艱，或者餐飲業聯同其他行業，例如零售業等一齊呼籲，但大部分業主都充耳不聞，可能見到政府有支援業界，而仍可勉強支撐，於是就無意下調租金，其實即使政府向業界提供支援，拎到現金後都只係左手來右手去，從政府取得資助後就用來交租，到底能否幫到員工或者老闆都係一個問題。
黃仲話，如果租戶無法交租而結業，店舖最終丟空，業主同樣得不償失，認為大家應該互相幫助，唇齒相依，避免結業潮好似骨牌效應一樣，一發不可收拾。不過，黃就冇明確講明要減租或者免租幾耐，只要大家有心，一齊渡過難關就好咁話。