政情：疫下龍舟難成事 大埔區會照放水

大埔區議會地區設施管理及文娛康體委員會日前開會，討論涉及逾167萬元撥款嘅龍舟競賽活動。會上多名泛民區議員，不約而同咁關注疫情影響，仲先禮後兵咁話，龍舟競賽年年都做得有聲有色，好希望每年都可以舉辦，覺得好期待咁話。之不過話題一轉，就講到本港依家仍然被疫情陰霾所籠罩，質疑屆時疫情會否結束。仲話活動預計有大約12,000人參與，若然爆發疫情會一發不可收拾，仲會衍生龍舟群組添！

新冠隨時爆 惟照做籌備

有區議員直言就算批咗撥款，民政事務總署或會因應疫情扣留款項，仲直接問團體去到咩情況先會決定取消活動呢？面對連番追問，大埔龍舟競賽委員會秘書林祿榮惟有坦言，冇人會知疫情呢個「炸彈」幾時會爆，但係籌備工作唔可以停，直至政府表示唔可以舉辦比賽為止，形容佢哋嘅角色好被動。聽落一眾區議員都對成功舉辦比賽有保留，但最終竟然以7票贊成、4票反對、9票棄權、以及一人未投票，通過活動申請喎。

上年拒撥款 惹各界抨擊

講到呢度，大家難免會諗起上年被拒批龍舟競賽撥款嘅「慘況」，有區議員當時就話，160萬元嘅龍舟競賽撥款太貴，否決咗撥款申請，引起各界抨擊。而民政事務總署其後更去信區議員，話香港受社會事件同疫情影響，好需要呢類活動團結各界，仲話唔排除會重新檢視有關嘅決定喎。但今年就突然「話鋒一轉」，大讚龍舟競賽好好，令人一時摸不着頭腦。

委員會主席任啟邦向本報否認係「今日的我，打倒昨日的我」，佢話今年活動由區議會名義招標，認為有番啲角色。再加上今年滲入新元素，會舉辦龍舟嘉年華，但同時又話喺開會途中，突然知道健身群組確診個案再錄新高，喺一系列防疫措施仍然實施之下，笑言應該都搞唔成喎。

咁其實一班區議員係咪一早預咗無法比賽，就將個波拋畀政府呢？言下之意就係政府防疫做得差唔關佢哋事，反正佢哋就大方批咗活動申請喇！不過咁，政府防疫抗疫做得差就係不爭的事實，都應該好好檢討吓。