中環出更：愈扶愈貧 容海恩斥港府迷失方向
本港貧窮問題一直嚴重，政府更被質疑「愈扶愈貧」！喺2018年獲委任為扶貧委員會（扶委會）委員嘅議員容海恩（Eunice），就坦言自己深有感受。佢提到自己一加入扶委會時，希望政府能夠做好滅貧、減貧、脫貧同防貧工作，令活在貧窮線以下嘅市民人數減少，但後來就覺得，現實同佢當初嘅想像有出入。
Eunice認為政府嘅扶貧工作欠實際方向，好多服務嘅受惠對象有限，同時幫唔晒整個有需要嘅群體；加上唔同嘅項目都好獨立，未能做到互補，亦好似做完就算，欠缺後續工作去跟進，引致政府嘅扶貧工作未必可以達至理想成效。
憂疫情加劇貧富懸殊
面對疫情持續肆虐，Eunice擔心會進一步加劇貧富懸殊問題。佢舉例喺停課期間，富有嘅家庭可以聘請私人老師，令到仔女可以學習唔同知識或者技能；但喺貧窮嘅家庭，反問莫非要媽媽一個人又教彈琴、又教英文、仲要教埋普通話咩？佢擔心疫情遲遲未能解決，只會進一步將貧窮家庭推向水深火熱之中。
另外，佢又提到自己亦都好關注女性在職貧窮問題，因為即使佢哋有工作，但依然活喺貧窮線以下，對家庭同下一代有好大影響，喺惡性循環之下只會更難向上流喎。
卓妮