中環出更:科技生產「冷冰冰」 吳國安:手工製品具獨特性

科技無疑為人類生活帶來便利,但唔少工作職位亦因此而消失。香港生產力促進局早前舉辦一項有關工業4.0嘅活動,向本地廠商介紹由外國引入嘅智能機械生產線。有份出席活動嘅香港電鍍業商會永遠榮譽會長吳國安,認為機械化生產的確有效率,不過佢又相信,人手製造永遠都有其市場。

吳國安話隨住現代社會嘅教育水平有所提高,願意從事重複勞動嘅人相對減少。佢話十年前同一班廠商到德國某車廠考察,當時已見識過使用機械臂生產嘅威力,佢相信經過咁多年之後,昔日受限於技術水平而體積龐大嘅機器,會隨住科技進步而愈趨輕巧,所佔嘅空間自然有所縮減,利於智能機械進一步普及。雖然智能科技生產屬無可避免,但難以完全淘汰人手製作,因為同總會有些微誤差嘅手工製品相比,機械生產嘅成品都一式一樣,既顯得冷冰冰,亦不及手工製品嘅咁有獨特性。

林智彬:人腦創意優勝

從事玩具生產嘅中華總商會青委主席林智彬(Lawrence)都有嚟參觀,話想睇吓有冇可能將智能科技應用於玩具製造業。Lawrence話玩具有車仔、飛機、機械人等不同形態,加上某啲玩具嘅配件會不時更新,如日本動漫「高達」面世超過40年,但時至今日仍然有新創作,如果每次都要調校生產線,生產成本會相當大,因此玩具業當中,智能科技所佔嘅生產比例未算太高。不過Lawrence話科技始終屬於協助角色,創意始終都係人腦優勝。

生產力促進局主席林宣武,就話利用機械生產唔係新事物,但礙於香港租金同人工上漲,令好多工廠轉移到內地營運。

隨住科技進步,智慧生產線所需空間同人手都大幅減少,況且香港有稅務優惠,以及原材料進出免除繁複手續,成本得到大幅下降,但最重要都係「香港製造」喺國際上仍然好受歡迎。

卓妮

第一手消息請下載on.cc東網iPhone/iPad/Android/Windows Phone Apps