政情：黎青龍與徒弟陳沛然 飯敍襯晒色
港大醫學院內科及肝臟科講座教授黎青龍同港大嘅合約將喺5月底屆滿，可惜佢最後不獲續約，佢嘅徒弟兼醫學界議員陳沛然（Pierre）得知消息後，上星期仲話畀咗張「金卡」對方，如果黎任何時候唔開心隨時可以傳召佢出嚟食飯、訴苦咁話喎！話都無咁快，尋日就碌卡嘞！
口罩及簿仔亦同一色系
Pierre尋日喺Facebook貼文，上載咗同黎喺酒樓食飯嘅合照，仲話已經將網民畀黎嘅留言及鼓勵打印咗出嚟，並親手交畀佢。
相中見到兩人不論係上衣、口罩同埋打印出嚟嘅留言簿仔都係以紫色調為主。有網民就留言笑指兩人明顯夾過「色tone」，仲大讚佢哋好靚仔，亦有人話黎嘅一言一行好「吸睛」，希望佢永不言休，未來兼職做KOL（意見領袖）喎。