有外媒上周引述消息指港府正調查民間人權陣線（民陣）係咪獲得外國資助，甚至計劃取締該組織。雖然民陣召集人陳皓桓即日回應話無啲咁嘅事，但翌日成員團體之一嘅街坊工友服務處（街工）就宣布唔再參與民陣工作同會議。唔知係咪唔少成員團體驚賴嘢上身問太多，據了解陳公開回應事件之餘，同一時間亦喺有成員團體代表在內嘅聯絡群組中發訊息，呼籲團體自行討論去留，更有指該群組近日已被刪除添！
民陣自2002年成立，多年嚟就唔同政治議題牽頭發起多場大型集會及遊行，其成員團體依家約有30幾個，當中分別係唔同政黨及勞工組織等。爆出相關報道後，儘管陳即刻澄清從未收取任何外國政府或機構資助，都似乎難以釋除憂慮，據悉陳當時喺聯絡群組中向各成員團體發訊息，當中指「明白各團體對國安法有所擔憂，但民間人權陣線是由各團體多年來艱苦建立，秘書處或召集人不能也不會隨意解散」，又呼籲各團體自行討論去留問題。而暫時就至少有4個成員團體決定退出民陣，亦有指有關群組「已消失」。
另外，日前有報道話民陣未有作社團註冊或屬違法，而協助其處理經費嘅團體或會受牽連。更有指街工當日率先公開同民陣劃清界線，其實都係因為佢哋曾經處理民陣經費往來，喺考慮法律問題後而即時宣布退出。不過街工主席盧藝賢尋日回應查詢時就話，佢哋過往係民陣其中一個成員，會開會和參與工作，但對於被指曾處理民陣經費往來，佢就話無聽過呢件事喎。