中環出更：徐英偉出席活動 被指違禁聚令

徐英偉尋日喺西環城西道、電車廠附近出席香港電車公眾免費乘車日嘅活動。根據民政局Facebook上嘅圖片，出席活動嘅嘉賓以4人一組形式企埋一齊，但兩組人之間係咪相隔1.5米距離就不得而知喇。葉錦龍仲喺該篇貼文留言，質疑徐英偉點解可以喺公眾地方參與多於4個人嘅群聚，仲標明自己係當區區議員添！

民政局：非公眾地方

民政局回應查詢時解釋，徐英偉係應主辦單位嘅邀請出席活動，主辦方亦指活動只接受獲邀請嘅嘉賓出席。佢哋亦指活動地點並不屬於《預防及控制疾病（禁止羣組聚集）規例》第599G章所指嘅公眾地方，所以冇違反禁聚令。警方就話唔評論個別個案，一般而言執法時會按既定程序同埋考慮實際情況採取適當嘅行動。

咪住先，葉錦龍唔係聲稱自己係當區區議員咩，但點解會唔知該處唔係公眾地方嘅，睇嚟下次提出質疑時要做下準備先喇，以免出醜啦！

卓妮