中環出更：虛擬會議成新常態 黃克強：未來或遙距見工
全球疫情嚴重，唔單止顛覆人類嘅生活，同時推動創科發展配合社會趨勢。經過逾一年時間，大家已經掌握點樣善用虛擬會議軟件，咁又有冇諗過當疫情結束之後，仲會唔會沿用呢類軟件，抑或係變到無人問津呢？科技園公司行政總裁黃克強（Albert）認為面對面溝通當然係最好，但相信已建立嘅新常態會持續，未來會沿用混合式運作。
科技可以幫助人類直接對抗疫情，仲有其他間接途徑，就係發展虛擬會議軟件喇！Albert早前喺一個網絡研討會上提到未來見工唔淨係要面對面，跟隨全球化趨勢，相信仲可以遙距見工添！雖則係方便咗，但同時代表大家要同各地精英「爭工做」。Albert話大家都要學習利用科技，話佢96歲嘅爸爸都會研究上網，所以大家無得搵藉口話唔學。Albert講到開發應用程式其實只需要一日半日時間，不過針對長者需要時，就要人性化啲，佢分享媽媽都會用平板電腦打麻雀㗎！
陳雙幸稱上堂人數多咗
同場嘅科技大學計算機科學及工程學系教授陳雙幸（Gary）分享，印象最深係舊年2月疫情初爆發時，即刻要轉晒網上教學，形容校園一夜之間就無晒學生，而大家都要努力適應網上授課。經過一年，Gary話大家對新常態非常受落，仲提到以前有朝早9點堂，好多學生都「走堂」，依家就會繼續喺網上上堂，上堂人數都多咗添！佢又講笑話大家遇到問題，例如突如其來嘅疫情，好多時會當大學教授係叮噹，期望佢哋可以即刻喺袋入面攞出法寶。其實大學教授都已經各出奇謀，努力進行科研，希望幫助社會㗎喇！
講到科技發展，會計師樓合夥人俞功成（Sam）都有啲心得喎。佢話近年嚟大環境影響會計界，新公司嘅成立數字急劇下跌，生意都愈嚟愈少。Sam嘅公司成立咗近20年，見證住香港嘅會計規定愈嚟愈嚴格，而面對人才難聘，年輕人唔想去會計師樓做得咁辛苦，其實可以點解決呢？佢話好多畢業生唔想喺會計師樓揮霍青春，而只係換得過低嘅人工，惟有開始普遍使用核數軟件，減低對人手嘅依賴喇！
卓妮