政情：任台長屢受指摘 林超英學識無我

「大家係鬧緊天文台台長」

話說林做台長時有唔少「出名」事迹，其中喺2008年颱風「鸚鵡」襲港期間，天文台曾喺9號風球生效期間，預計將於「清晨」改掛8號風球，當時普遍市民所認知嘅清晨咪就係早上，以為第二日唔使返工。點知天文台突然喺凌晨分別改掛8號風球同3號風球，搞到唔少市民第二朝要急急腳趕住返工，天文台亦收到好多投訴。

經歷過種種爭議事件，點樣令自己心情保持平靜呢？佢話做人有「我」先有煩惱，所以面對別人指摘時，要理解為大家係鬧緊當時做緊「天文台台長」嘅嗰個人，而唔係鬧緊「我」，如果大家咁樣諗時，咁呢啲煩惱就唔會傷害到自己。不過，佢話絕對唔可以卸責，強調自己當時仍然要做好台長嘅工作，有負責向公眾解說清楚。

佢又分享處理情緒起伏嘅「獨門秘招」，就係當遇到一件事唔知點算好時，佢會想像自己喺30年後回首睇番依家嘅處境，諗吓喺呢幾十年間會發生咩事，然後就會發現依家面對嘅問題只係好小事咁話喎。之但係呢招係咪人人都受用呢，睇怕都要睇番大家自身嘅歷練同覺悟能力啦！