政情：同囚鐵窗 劉頴匡問「夠精彩未」楊岳橋爆粗

AY當年出席反新界東北發展案聲援集會嗰陣，提起話以前成日同犯事嘅後生仔講，案底對人生有好大影響，但又覺得因為反東北案同衝擊公民廣場而被判入獄嘅年輕人擁有「呢個案底令佢哋人生變得更加精彩」。AY爆出呢番言論後引起社會爭議，仲被質疑鼓勵市民犯罪，最後佢先解釋話失言同埋道歉。

劉頴匡女友指為自嘲

最近47名民主派因參與35+初選而被控「串謀顛覆國家政權罪」，其中有部分人仍還押當中。被告之一、前民間集會團隊發言人劉頴匡女友尋日探監後，指劉頴匡喺收押所內以叫喊方式同其他人傾偈，仲有同AY講「點呀，人生夠精彩未？」而AY就以爆粗回應。劉嘅女友就形容佢哋係自嘲、苦中作樂。AY保釋被拒後，唔少人搵番佢當年嘅言論，睇嚟佢當年都冇諗過自己會淪落到咁喇！