政情：統治18年 西醫工會換莊 楊超發敗選 黑面應傳媒

工會18年來冇交稅 缺全面審核

擁有逾1,500名會員嘅西醫工會，創會以來一直由楊超發擔任會長。今屆選舉喺上周六舉行，授權票有逾500張，喺律師見證下，核實所有授權票，選舉結果係楊以32票之差落敗。楊喺落敗後冇講過任何嘅感受，亦唔知佢日後會唔會再積極參會工會嘅會務。

新任會長梁漢輝會後話希望工會重回正軌，唔能夠被一個人長期霸佔工會，又話上任後首要工作係團結工會同幹事會，並翻查過去7年財務紀錄，如有出錯會跟進追究。至於成功連任嘅義務司庫亦話會追查過去18年冇報過稅嘅原因，會向稅局交代云云。

實際上，喺近呢幾年喺西醫工會選舉前已接連爆出涉嫌選舉不公嘅問題，例如喺前年11月幹事會選舉，有指喺選舉前夕派畀會員嘅授權票，票上已預印咗楊超發嘅名字，意味楊可代其本人投票，令楊當時持有嘅授權票高達近70%，足以左右選舉結果，當時楊回應有關傳聞時，只係話工會已組成委員會處理事件，但強調並非調查。其後，有成員亦揭工會成立18年來冇進行過全面嘅內部審核、財務審核、報稅同交稅。

曾涉選舉不公 6幹事集體辭職

直至今年一月下旬，工會幹事會6名成員發出聯合聲明，指因不滿工會處理幹事會新選舉方案的手法，決定集體辭職。其中有份辭任嘅會董更直指工會喺舊年11月舉行周年大會，當時工會會長楊超發，以無法認證所有授權票為由，強行終止周年大會，惟在場嘅律師提出可以審視無效授權票亦唔理會，認為選舉存有不公。但楊回應事件時只係話會內嘅事無可奉告。

依家西醫工會換咗「莊」，所有嘅風風雨雨係咪會停止呢？工會究竟係咪會有另一番新氣象呢？睇嚟大家要拭目以待嘞！