中環出更：主教山配水庫變博物館？ 凌嘉勤籲保留原貌
深水埗主教山配水庫嘅古羅馬式建築有逾百年歷史，早排險被清拆，仲惹來全城熱議。社會上有唔少聲音建議，將主教山配水庫改為博物館、咖啡廳，甚至開演唱會！但規劃署前署長凌嘉勤就認為保育都要有原則，建議盡量保持主教山嘅原貌，咁先至可以話畀市民聽香港早期嘅水務發展歷史。
凌嘉勤同議員鄭泳舜日前就上咗主教山視察，一齊討論吓主教山日後保育嘅方向。凌對於大幅改動主教山有所保留，認為要用低調、簡單嘅方法保育配水庫。其一因為配水庫上蓋支撐能力不足，難以畀多人站立，所以建議可以打開多少少上蓋，令多啲陽光照入配水庫內，加建梯級方便市民入內，再配上簡單嘅水務歷史展覽，希望市民明白享有自來水並非必然，學識更愛護及欣賞香港呢座城市。
喺發展配水庫之外，凌認為應該思考整個主教山嘅用途，例如可以種植本地嘅樹木同花朵，甚至修葺小路，有別於一般市區嘅大型公園，盡量保留主教山原貌，令主教山成為鬧市中嘅郊野公園。鄭泳舜就提到疫情下港人熱愛郊遊，當市區都有郊野公園嘅話可以方便市民。鄭亦促請政府各部門可以在保育主教山配水庫項目上配合得更好、更靈活。
卓妮