中環出更：首個女性友善特色籃球場 卓婷：方便自在好多
雖然香港首面奧運金牌係由女性攞到，但多年嚟我哋見到街頭籃球場等運動設施，好似多數都係男性使用為主，女性使用率貌似偏低。卓妮尋日就去咗參觀全港首個女性友善特色籃球場，雖然就唔係話女性專用，但設施上都加入咗好多女性用家意見，例如加咗塊銅鏡喺出口附近，畀女仔打完波可以整理儀容，希望可以推動運動場上男女平等咁話。
其實香港玩籃球嘅女仔一直都唔少，只係資源上佢哋總係冇男性球隊咁多。好似香港女子籃球猛將卓婷咁，佢都覺平時練波想搵場地唔太容易。咁又難怪嘅，始終無分性別本地嘅籃球場地設施都真係僧多粥少吖嘛！
卓婷話平時都有跟機打街場，但係唔知點解女仔跟機總係會坐耐啲，先有輪到上場打波嘅機會，而且同男仔一齊打波，難免都會有啲身體碰撞，認為點都係冇同女仔打咁方便自在（口架）喇，所以覺得有女性友善嘅球場係好事，起碼運動場上男女共融嘅訊息可以慢慢植入大家觀念。
黃梓謙：增拉筋地方 打卡點
至於主辦方嘅公共事務及市場推廣總監部門主管黃梓謙原來中學時曾經喺甲二組球員，所以好明白用家心態，因此今次將屋邨球場活化成有拉筋地方、掛鈎放背囊嘅地方、色彩繽紛同打卡位嘅球場，希望唔單止可以吸引多啲人去參與運動之餘，都可以慢慢將球場變成本地旅遊嘅一個景點。
同場嘅電視台前體育主播伍家謙都有份參與活化球場嘅設計，原來球場欄柵上面嘅「女兒當入樽」、「Never too late」等鼓勵字句就係由佢同拍檔一齊諗出嚟，伍話希望當大家練波練到好攰時，抬頭望到啲字句可以畀到動力球員堅持落去。問到佢一對龍鳳胎仔女就嚟一歲，第時會唔會畀阿女玩運動時，伍就話唔會規範仔女嘅志向啦，但如果佢哋肯玩運動都會支持。
卓妮