前香港眾志秘書長黃之鋒早前承認喺2019年6月21日參與同煽惑包圍灣仔警察總部嘅未經批准集結，被判監13.5個月，依家正喺石壁監獄服刑。雖然獄中嘅工作唔算粗重，但由於被編配為甲級囚犯，因此一年365日嘅早、同晚餐都被限於單人監倉獨自進食，就算過年過節都冇例外，聽落都好似好慘咁喎！
黃之鋒嘅社交網站尋日再有更新，根據轉述，黃目前喺懲教所，被安排喺書籍裝訂工場工作，製作圖書硬皮封面畀公共圖書館，閒時就睇小說、學術書籍同聽電台節目打發時間。之不過，黃話喺監獄入面嘅恐懼以及同孤寂搏鬥，並唔容易。尤其係每當憶起大家新年聚首一堂嘅時候，而佢身為甲級囚犯，每日嘅早、晚餐都被限制於單人監倉孤零零咁進食，感覺相當難受。黃又話，偶爾睇見電視劇集裏面嘅演員同親友一齊食飯嘅畫面，難免會觸景傷情，唔知等到邊一日先至可以喺囚室以外嘅地方好好咁食一餐飯喎。