前日有外媒引述消息，話港府正調查民間人權陣線（民陣）有冇獲得外國資助，甚至計劃取締該組織。雖然民陣召集人陳皓桓好快就回應，強調民陣冇收過外國資助；但有成員團體表示「驚驚」，其中街坊工友服務處（街工）尋日就迅速劃清界線，表明未來唔會再參與民陣工作同會議咁話喎！
街工喺Facebook發貼文，表明未來唔會再參與民陣嘅工作同會議，又強調街工未來會喺基層權益議題上繼續努力。雖然貼文並冇交代退出嘅原因，但退出嘅時機，難免會令人覺得同外媒嘅報道有關。消息指，近日已經有唔少民陣成員團體感到憂慮，其中已經有3、4個成員團體退出咗民陣。
而陳皓桓就喺Facebook發文回應，指尊重同理解成員團體退出嘅決定，但就話民陣成立至今已經有17年幾，經歷了多場政治事件，都係希望搭建一個合法、和平、理性及非暴力嘅平台咁話喎。陳又強調民陣並唔會解散，只要有團體留低，佢作為召集人願意同民陣共存亡。
新加坡《聯合早報》前日引述消息報道，港府正調查民陣有冇接受過美國國家民主基金會（NED）資助，一旦搵到證據涉嫌違反《港區國安法》，就可能會喺短時間內取締民陣。陳皓桓當時回應，強調冇收取過任何外國政府或機構嘅資助。
卓妮