中環出更：地球生態環環相扣 梁榮武：物種失多樣性 加速傳播疾病
隨着人類活動範圍不斷擴大，野生動物嘅棲息地日漸縮減，導致好多物種消失、或陷入滅絕嘅邊緣。天文台前助理台長梁榮武早前應都會扶輪社之邀，線上發表氣候變化所帶來嘅啟示。梁指出地球生態環環相扣，就算低等如細菌，亦有其存在理由。若果物種失去多樣性的話，疾病嘅加速傳播，將會成為人類難以擺脫嘅危機。
到底生物多樣性，同傳染病有何關係呢？梁榮武指病毒原本嘅宿主，會將病毒傳畀其他動物，譬如蚊會咬人，亦會叮咬牛、羊，若果物種嘅種類唔夠豐富，人類感染傳染病嘅機率就有可能上升。但好可惜，生態系統已受到人為嘅破壞，嚴重威脅野外動物嘅存活，加上全球暖化促使害蟲活躍，登革熱同瘧疾等傳染病只會更形猖獗，可見保護環境，防止溫室效應加劇，實屬人類社會當務之急。
然而觀乎去年，經濟活動雖受新冠疫情嘅打擊，但本港嘅酷熱天氣日子竟高達47天！梁就話呢個數字，天文台曾經預測喺2050年先至來臨，結果係提早30年出現！佢又話人類科技突飛猛進，生活質素以幾何級數上升，實仰賴於化石燃料，若然棄用，無疑係掀起另一場革命。為咗徹底解決氣候暖化問題，除咗要發展清潔能源，亦不妨嘗試改變個人行為，譬如今年添置衣物嘅數量較往年少一半，碳排放亦會隨之降低。
都會扶輪社社長徐嘉鴻（Harvey）認為，當今社會物質充裕，好多家居物件儘管新淨堪用但仍遭到汰除，未免浪費。而佢就留意到網上有二手貨嘅交易平台，若然大家添置物件前都先考慮一吓二手貨，無疑係另一種環保嘅實踐。Harvey認為減少食肉，多食素菜，有助減少蓄牧業所造成嘅碳排放，且好多蔬果食物都有利腸道健康，仲可以抗氧化添。
洪文正：氣候變化漸見明顯
半島東扶輪社創社社長洪文正（Alex），就感受到氣候變化漸見明顯，如近幾年嘅農曆新年都頗為暖和，就算去到回南天，都唔及過往咁潮濕。Alex又話美國已謀求重返《巴黎協定》，畢竟氣候暖化影響全球，冇人可以置身事外。
卓妮