政情：六旬翁打疫苗後亡 葛珮帆促政府交報告
本港近日出現六旬翁接種疫苗後死亡嘅案例，事件引起市民關注，雖然政府就強調死因同疫苗接種無直接關係，但唔少市民都用身體表明「博唔過」，令接種疫苗嘅甩底人數大增。立法會衞生事務委員會將會喺下周五（12日）開會，委員會主席葛珮帆（EQ）透露將會就事件討論，仲話打算喺開會前向政府發信，要求當局到時提交報告解釋，並期望當中涵蓋解剖報告等內容。
下周開會前向當局發信
其實喺疫苗接種計劃開始之前，其安全性同穩定性一直都備受質疑，依家發生打完疫苗不久後嘅死亡事件，更加令市民心大心細。被問到委員會會否就事件討論時，EQ就話相信到時一定會有議員提出討論，仲話即使冇人提，佢都會自己提，而EQ亦計劃喺下次會期前，發信要求當局提交詳細報告解釋，例如交代附有解剖報告嘅死因判定、各項將會為市民接種嘅疫苗安全性最新數據等，希望咁樣有助釋除公眾疑慮。
至於EQ都留意到近日嘅接種人數有所下降，加上據佢所知，都有好多優先群組以外嘅市民好想打疫苗，所以佢都會喺會上提議，開放接種疫苗名額畀其他60歲以下嘅市民使用。另一方面，由於政府訂購嘅疫苗仲未全部到貨，所以佢到時亦會再追政府提出詳細嘅疫苗抵港時間表。