政情：貼文扮哀傷 許智峯荒謬寫錯荒繆
47名發起或參與去年民主派「35+」嘅初選人士涉嫌違反《港區國安法》，眾被告仍須還押。現正被警方通緝、流亡英國嘅前議員許智峯喺社交平台發文，鄭重其事咁連續寫3次話現實世界好「荒繆」，被網民捉錯字。之不過，可能許身處英國太耐，中文已經漸漸退步，完全冇發現自己將荒謬寫作「荒繆」喎。
網民嘲畏罪潛逃最荒謬
許智峯喺Facebook發文，話每日提自己要喺「荒繆、荒繆、荒繆」嘅現實世界努力生存落去。雖然許冇講明自己因乜嘢哀傷，但網民就睇見佢連續寫錯3次「荒謬」，仲話「最荒謬係你造假文件畏罪潛逃」，但許就好似仲未注意到自己寫錯字喎。
另外，有網民就留言叫佢「好好喺英國過啲狗都不如嘅生活喇」，亦都有人勸佢「慳啲啦」，仲稱呼許為「逃犯」。其實被捕人士中不缺許嘅前黨友，如果真係擔心嘅話，又不妨返嚟探望吓？