中環出更：寄望打針度疫境 施榮恆憂現變數
環球經濟因疫情而深陷泥沼，因此好多人都寄望疫苗面世之後，市況能有所恢復。東華三院前主席施榮恆（Ivan）認為，若果接種疫苗能有助實現清零嘅目標，早前香港同新加坡嘅旅遊氣泡計劃亦有可能重啟，甚至擴展至其他國家，到時外國遊客重新來港，旅遊零售等消費市道，以及企業營商信心都得以改善。設想雖然美好，但Ivan仍懷有顧慮，因為要走出疫境，當中存在變數。
早前Ivan拍片上載網絡，同大家分享佢對未來一年嘅睇法。Ivan話相信大家都好想知道疫情何時退卻，幾時可以毋須再戴口罩周圍去。儘管本港同好多發達國家一樣，已陸續開展疫苗接種計劃，不過全球各地疫苗都係分批接種，各國重啟及開放邊境嘅步伐始終不一致，加上變種病毒喺各地出現。今年能否完全恢復經濟，仍屬未知之數。至於疫苗是否可以擊退疫情，在於接種疫苗嘅人口比例，能否達到產生群體免疫嘅門檻。
駱百強睇好數碼及綠色產業
雖受疫情衝擊，但製造業喺過去兩年，已遭受中美貿易糾紛嘅影響。香港品牌發展局選任理事駱百強（Robert），提到港商經過接連衝擊，已經重新規劃生產同市場布局，以分散風險。特別係較受地緣政治影響嘅企業，例如半導體、電子設備生產商等，都會轉移去可以提供穩定供應鏈嘅地方。Robert零舍睇好數碼同綠色產業，話各國普遍視有關產業為經濟復甦嘅重要一環，例如內地全面實施綠色發展理念，鼓勵同推動新能源發展。
展覽業亦喺疫情下受到重創。展覽推廣公司嘅策劃經理雷景良（Kerry）話，過去會議展覽中心經常爆滿，只因香港場地不足。如今面對疫情，香港展覽業根本就開唔到工，為掙扎求存，Kerry惟有忍痛裁員，足足減少咗三分一嘅人手，基本運作僅可勉強維持。Kerry話長遠而言，香港展覽業未必被內地取替，譬如最大嘅珠寶展都喺香港舉行，但都真係要提升番競爭力喇，Kerry指內地嘅展覽會，場地大、限制少，反觀香港限時布置、拆除，缺乏空間同時間發揮創意，真心希望香港能增加展館場地面積，話咁先可以好做啲、唔使趕頭趕尾囉！
卓妮