隨着疫情漸趨穩定，大家又可以重回辦公室與同事一起工作。不過工作上人與人相處和共事往往有機會出現衝突。為了創造一個和諧和有效工作間，懂得處理衝突係十分重要。
「阿昌，你做報告嗰時認真諗清楚先啦！」
「唓！咁華哥你自己做囉！」
老闆光哥聽到有人鬧交，就問：「發生咩事呀？」
阿華回答：「阿昌囉，講好咗份報告要點做，最後都係得份咁嘅嘢！」
阿昌說：「我咪跟你講咁做囉！你依家又話咁唔啱，咁你依家想點啫？」
光哥拍拍阿華同阿昌膊頭問：「嗱，交就鬧咗啦，但份報告做好未呢？」
阿華同阿昌：「Er……」
光哥說：「職場嘅衝突時有發生，不過呢啲衝突，除咗會影響你哋嘅工作關係，打擊大家嘅士氣，搞到工作效率同生產力減低，仲會令到你哋有壓力！」
阿華同阿昌說：「我都唔係想搞到咁！」
光哥說：「我唔係怪你哋，不想過兩招畀你哋，學吓點樣化解衝突。最緊要大家都要互相尊重，唔好人身攻擊。我哋要對事唔對人，專注番喺客觀嘅事實上面。另外講嘢嗰時要平心靜氣、有禮貌同理性，千祈唔好喺語氣、面部表情同身體姿勢上流露出敵對意思。你嘅想法亦都要清楚表達以減少誤會，可以問一問對方明唔明自己想傳達嘅訊息，亦都等對方表達一下佢嘅睇法。」
阿華同阿昌回應：「明白！不過有時真係火遮眼，控制唔到自己嘛。」光哥說：「好簡單，當你憤怒嗰時，可以暫時抽身離開令你憤怒嘅環境，平復一下情緒，又可以分散一下自己嘅注意力，好似去飲啖水，洗個面，或者慢慢咁呼吸去幫助放鬆。我哋每日有三分一時間返工，大家都係想工作順利開心啫！」
職業安全健康局
www.oshc.org.hk