政情：何啟明冷血捱轟 黨友嘲係唔係人?!

口講聆聽意見 惟未立項研究

多名議員關注本港失業援助制度，指截至2020年，逾20萬失業人口中，只有9.6%領取失業綜援，質疑現時失業保障制度未能涵蓋大部分失業人士。議員梁美芬指，政府常藉詞指失業援助金恐變成長期政策而拒絕成立，但其實失業援助金只屬臨時方案，預算維持半年，向有需要人士每月派發8,000港元，涉及費用約為150億元。梁指政府推出多次抗疫基金亦動用到幾億元，認為政府要活化制度，並稱將給予政府半年期限，若半年後仍未能支援失業人士，政府則需要將能力不足嘅官員換走。

何啟明就回應話，失業人士唔一定生活得困苦，佢哋可能擁有資產，或者相對有錢、同高薪，故可以跌入在職家庭津貼、食物銀行等嘅保護網；而情況最艱難嘅人士，則會跌入最底層嘅綜援保障中。何表示，政府難以於短時間內全面檢視整個失業保障制度，但會聆聽意見，不過經過議員多番追問，何承認政府未有立項處理相關制度嘅研究。

何話音剛落，隨即有議員表示不滿。議員柯創盛批評，政府對於失業援助金嘅倡議「意見接受，行動照舊」。郭偉强則諷刺何：「局長對香港市民好有信心，年幾唔做嘢都冇問題，都開到飯。」又直斥何「人嚟（口架）？」。郭指即使失業人士擁有資產，亦冇可能賣樓抵債，或變賣其他資產過活，失業市民亦未必想一次過花光積蓄，因為市民儲錢是希望向上流動，但政府嘅態度形同要市民往下流動。

委員會主席、同屬工聯會嘅陸頌雄，就指社會保障體系是治國安邦嘅大問題，質疑局方是否真正理解過市民嘅感受，以及中央政府嘅精神。何啟明則回應指，內地處理的是「絕對貧窮」，與香港「相對貧窮」的計算方法不同。

拒答檢討最低工資 議員鬧爆

何啟明並非首次喺會上被黨友狠批，在上月18日嘅立法會人力事務委員會會議中，陸頌雄提交私人條例草案，要求將最低工資嘅檢討周期由每兩年改為一年一次。議員麥美娟指，該私人草案不涉及政府公帑，睇唔到政策上有不可行嘅地方。何啟明卻稱政府政策並非一個人決定，當立法會根據機制諮詢當局，局方先詳細研究法案對於公共開支、政府運作及政策構成嘅影響，屆時會正式向立法會確認。麥美娟隨即炮轟，「即係你（何啟明）耍我哋（議員）呀依家，唔答呀？開呢個會嚟做咩？開呢個會之前唔係諗咗會唔會支持咩？」又着何「唔熟就問隔籬個處長」，指即使法案涉公共開支，只要政府支持，都可以改由政府推動。