中環出更：過往點行要靠自己 梁禮賢：自我挑戰踏行醫路
近年教育界興起「生涯規劃」，以協助青年人了解自己嘅潛能同志向，從而作出明智嘅升學或就業選擇。國際獅子總會中國港澳303區日前公布一項關於青少年選擇職業嘅問卷調查結果。出席活動嘅獅子會總監梁禮賢憶起自己年少嘅時候，社會上甚少有機構向青少年講解如何規劃人生，將來條人生路到底係點樣行，基本上要靠自己。雖然梁今日選擇行醫，但其實喺學生時代，梁對醫學嘅興趣唔算濃厚。
如果唔係有興趣，何以後來會懸壺濟世呢？梁禮賢話自己讀書嘅時候，對生物科好有興趣，所以佢嘅志向係將來做生物學家，但礙於當時香港喺呢方面嘅資源比較短缺。但由於讀書成績優異，某日梁嘅老師同佢話醫學院比較難入，建議佢嘗試吓，而梁聽完老師咁講之後又想挑戰自己，結果以全班第一嘅排名，順利入咗醫學院，最後做埋醫生添。
徐玉珊：不斷學習才可配合社會
出席同一活動嘅人力資源機構高級副總裁徐玉珊（Lancy）都話，昔日社會資源有限、資訊亦相對貧乏，青少年都係靠興趣選擇職業。Lancy話屋企就做生意嘅，雖然佢間中都會幫吓手跑數同埋做宣傳，但就唔知道一間企業嘅架構同部門分工，其實可以好複雜。於是佢做做吓就發現，原來自己對人力資源同行政管理方面都有興趣喎，況且自己又鍾意同唔同嘅人接觸，所以就選擇從事人力資源嘅行業喇。對於生涯規劃嘅睇法，Lancy覺得應該不斷學習，先可以配合現今嘅社會生態。
儘管昔日嘅青少年，比較少討論生涯規劃，不過獅子會第二副總監冼健岷（Henry）就認為，最緊要都係睇番每個人嘅性格，從而選擇合適嘅行業。Henry就以自己為例，話以前覺得自己嘅性格適合做金融銷售，加上就讀嘅學科亦都配合呢一行，以為成件事會順理成章咁發展。之但係隨着時代嘅轉變，今日好多年輕人已經不囿於單一嘅職業。Henry慨嘆話世界已經唔同咗，不過社會就係有賴呢啲年輕人，先至會日益進步喎。
卓妮