政府早前封區，透過抽查大廈嘅污水樣本，希望可以搵出病毒源頭，當局又聯同香港大學團隊合作，透過檢測污水中嘅病毒，從而搵出必須強檢嘅大廈。議員鄭泳舜、陳恒鑌同柯創盛日前先後到訪污水抽樣站同港大環境生物技術實驗室，了解污水病毒監測，包括抽樣化驗技術同流程。佢哋認為，雖然抽驗水辦有成效，但係數量唔夠，希望政府可以增加抽驗水辦嘅數量。

鄭泳舜話喺農曆新年前，政府透過新方法，同港大合作抽驗水辦，了解水中有無陽性反應，雖然喺過去兩個月合共搵到51個隱形傳播鏈，但係佢哋就想了解技術點樣可以做得更好。譬如話驗水辦嘅數量仍然唔夠，每日抽驗20幾個水辦，所覆蓋嘅人口有百幾萬，建議環境局檢視一下過去有咩地方可以改善，同時間增加驗水辦嘅數量。

陳恒鑌就話最好係防範於未然，要知道社區入面有無隱形傳播患者，抽驗水辦似乎係一個比較創新同有效嘅方法，由渠務署負責抽水辦，之後送去實驗室，過程由環保署負責協調，大學裏面嘅研究資源亦得到善用，政府院校嘅科研成果可以使用係香港之福，亦可以將呢套技術進一步發展成為創科一個成就。

卓妮