中環出更：經濟恢復需時 蔡宗富籲再推保就業
香港鐘錶業涉及製造、出口與零售，於本地經濟發展佔相當分量，然而舊年疫情來襲，市道大吹淡風，業界苦不堪言。香港鐘表業總會董事會上個月換屆，新任主席蔡宗富早前聯同林煒曜、林文華兩位副主席，以及當年顧問李永安，拜訪會員了解經營狀況。佢話就算疫情有望好轉，但通關無期遊客未至，加上經濟恢復需時，業界都亟需政府提供支援以渡過難關。
蔡宗富話以鐘錶製造而言，因主要嘅出口對象都飽受疫情困擾，經濟活動陷於收縮，影響到舊年嘅出口訂單，較前年銳減七至八成。由於疫情打擊消費意欲，加上遊客絕迹都令到業界喺零售方面尤其艱難，往時由十月至農曆新年本來屬於消費旺季，但依家好多同業嘅生意額跌咗八成，部分已經捱唔住「關門大吉」。佢話除咗舊年嘅保就業計劃，政府就再無向零售業提供紓困措施。對於今年嘅市道，蔡宗富保持審慎，縱使疫情受控恢復通關，經濟回暖都需要一段時日，為免倒閉情況加劇，政府宜推出新一輪為期半年嘅保就業計劃。
林慶麟：做生意要講誠信
遊客因疫情而裹足，鐘錶零售有何方法開拓本地客源呢？香港鐘表業總會零售業部部長曾子禧，指過往外國知名品牌嘅新款手錶，未到香港發售前已先喺歐洲開賣，因此本地嘅手錶發燒友會把握出門嘅機會，順道購買。由於依家佢哋要留喺香港，曾子禧所屬公司就睇準呢一點，同多個外國品牌合作，新錶發布後一兩個星期，香港就有貨到，並首先喺線上發布產品資訊，線下就同客人約好時間到店內，用類似包場形式嚟親身體驗產品。曾強調呢段時間只容許預約客人喺店內，而店內會做足消毒措施，務求令顧客消費得安心。
至於曾子禧嘅業務同事林慶麟，就投身業界近30年。佢話做鐘錶零售，好多品牌都並非獨家發售，顧客隨時都可以去另一間購買，所以要留住客人，做生意就一定要講求誠信。卓妮