中環出更：議規會通過 議員行為不檢停賽減薪
自民主派議員總辭後，建制派最近密鑼緊鼓大幅修訂立法會《內務守則》同《議事規則》，以防日後再有泛民拉布拖延會議情況發生。議事規則委員會主席謝偉俊（Paul）尋日喺會後話，會上已原則上通過對行為不檢議員設罰則，並將於本周五嘅內務委員會討論，惟因須待政府修例配合，故仍未有落實時間表。而有關限制各類議案辯論時間等嘅建議，同樣會一併交上內會討論，預計最快可以喺3月24日嘅立法會會議上獲通過。
就行為不檢議員設罰則嘅建議方面，Paul話英國有關罰則較嚴格，如果議員被定為行為不檢次數超出上限，整會期將被「停賽」，但他們訂立嘅罰則較寬鬆，若議員被裁定行為不檢一次，將會規定對方唔能夠出席立法會所有會議一周，如再犯就「停賽」兩周，如此類推至4及8周等，而且唔設上限。不過該委員會就未有訂立罰款金額，又指最終係咪可以罰款，都要等法例通過先可以落實喎！佢又話大部分議員都同意扣減被罰議員嘅薪金，惟對削減其他津貼有保留。
支持辯論時間劃線
至於為辯論時間劃線、縮短議員發言時間，同埋訂明小組委員會現任主席喺新會期選出主席前仍可處理一般事務等建議，就分別由議員盧偉國及陳克勤提出，該委員會上周亦已收集全體議員意見。Paul認為有關建議係為咗平衡議會有效運作同個別議員喺憲制上發言權利，強調已充分考慮各方意見，亦得到大部分議員支持咁話。
卓妮