政情：法援署擺烏龍 袁嘉蔚變先生
有時啲中性嘅名會好易被搞錯性別，過往都有區議員被突然變性，仲要唔止一個添！今次被變性嘅，竟然係知名度比較高嘅南區區議員袁嘉蔚。過往佢有加入過政黨，亦曾經報名參選過立法會選舉，之後仲被取消參選資格，相信喺民主派區議員嚟講都算係為人熟悉。但政府竟然咁都可以搞錯，認真失策喇！
上次加姓 今次變性
袁嘉蔚尋晚喺Facebook上載咗一張相，係由法律援助署寄畀佢嘅一封信。睇真啲，的確冇寫錯袁嘉蔚個名，但係就寫咗「袁嘉蔚先生」，而唔係「袁嘉蔚小姐」喇。明明袁嘉蔚係女性，不過法援署就突然幫佢變性，稱呼佢為「先生」，到底今次搞邊科呢？
唔單止上載張相，袁嘉蔚仲話「繼梁袁嘉蔚之後，今次變先生」。照咁睇嚟，政府部門唔係第一次搞錯同袁嘉蔚有關嘅嘢喇喎。雖然今次冇將佢個名加多個姓，但係就將佢變咗性，政府可以喺處理同一個人嘅事上搞錯成兩次，擺到明就係求求其其啦，真係要認真檢討下喇！