政情：網站用黃黑標誌 港府又係踢先肯改
政府網站「投考政府工」主要針對年輕人，向佢哋簡介唔同政府工職位。估唔到連標誌都好貼切年輕人嘅「口味」，事關多年嚟沿用黃、黑色設計。議員郭偉强睇唔過眼，向公務員事務局局長聶德權反映問題，而政府「踢一踢、郁一郁」，終於改變標誌顏色，簡直係遲來的「撥亂反正」。
議員質疑外判監管鬆散
有關網站由效率促進辦公室設計，睇番其Facebook網頁，由2015年起已經沿用黃、黑色設計，即使經歷違法佔領行動（佔中）同反修例風波，政府都無動於衷，始終企硬用呢個設計喎。立法會公務員及資助機構員工事務委員會主席郭偉强，早幾日喺會議上特別提到，有關標誌會令人產生不必要聯想，促請局方跟進。而聶德權就話會向有關部門反映意見。
政府卒之喺前日（19日）將標誌轉為橙、紫色，郭偉强就認為政府上上下下嘅公務員團隊，欠奉政治敏感度同意識，佢話明白好多政府工作都係外判，但監察未免過於鬆散，認為隨着社會氣氛轉變，政府應該醒水、加強把關。而網民就未收貨，留言話有關網頁係咪應該改晒過往貼文上嘅標誌呢。辦公室回覆本報話，係因應公眾意見，檢視咗圖標嘅設計色系並作出適當調整。