政情：泛民搞殘區議會 區管會踢走區議員 政策恐更離地
今屆區議會由民主派主導，自上任起不但同政府關係緊張，且日趨政治化，盲目地為反而反，以致好多地區上原來嘅運作都受到影響。而政府繼早前唔再委任現屆區議員出任各區嘅分區委員會委員、以及唔再畀泛民區議員加入撲滅罪行委員會後，最新嘅舉措係連各區嘅地區管理委員會（區管會）都唔再邀請區議會代表參與，變相做番政府嘅內部官方會議。雖有區議員表示不滿，不過當局就話，政府部門有充分渠道聆聽區議會聲音。
政府早喺1982年起推行「地區行政計劃」，喺全港各區設立區議會同區管會，後者由當區民政事務專員擔任主席，成員唔單止有主要服務嘅政府部門代表，例如教育局局長、警務處處長等，過去亦會邀請各區嘅區議會正、副主席，以及區議會轄下各委員會嘅主席加入。
余德寶批政治凌駕民生
早喺舊年11月已經有消息傳出，政府未來計劃唔會再邀請區議會代表加入各區嘅區管會。而翻查政府網頁上嘅最新名單，依家全港18區嘅名單中都再見唔到區議員嘅蹤影，只係得番各個政策局或政府部門嘅代表。
油尖旺區議會副主席余德寶就喺Facebook發文，形容做法係再次飛走區議員，質疑政府一再以政治凌駕民生，仲話大角咀嘅死車問題、旺角嘅無家者等嘅民生議題，本來都可以喺區管會上跟進喎。佢又批評政府玩呢啲政治把戲，只會令其封區或「安心出行」等等嘅政策，變得更加離地、勞民傷財咁話。
民政署：會保持緊密溝通
而睇番民政事務總署向區議會嘅回覆就話，各屆區議會合共成立咗313個專責委員會或工作小組，形容政府部門已經透過有關平台，有效聆聽到區議會嘅聲音。信中又指出，政府經過檢討後決定理順區管會嘅運作，強調政府相關部門會透過不同嘅平台，繼續同區議會保持緊密溝通。區議會被民主派主導一年後，上個月就被民政事務局局長徐英偉形容運作失效，睇怕政府都好擔心，一旦泛民入埋區管會，恐怕只會繼續搞搞震。不過當局所謂已經有效聆聽地區嘅聲音嘅呢番說話，唔知又會唔會只係自我感覺良好呢？