中環出更：陸頌雄嘆高樓價礙年輕人向上流
土地不足同房屋短缺，一直都係困擾香港嘅首要問題，年輕人置業無望就更感到前路茫茫。勞工界議員陸頌雄（Michael）話，自己一直以來都比較好彩，未試過失業，最多都係試過幾個禮拜冇工返。反觀依家投身職場嘅年輕人，月薪萬幾、兩萬銀人工本來都幾好使，但可惜樓價高企，導致年輕人嘅社會向上流動機會大減。
學生時代無職業規劃課程
Michael回首過去，話自己運氣都算唔錯，踏足社會之後打過幾份工，每份工之間嘅空檔期最多都係得幾個禮拜，未試過真正失業。之不過，佢話屋企都嘗過辛苦嘅時段，話童年時試過只得爸爸返工而媽咪失業，令佢深感失業為家庭帶來嘅問題。至於Michael學生時代有冇參加職業生涯規劃課程呢？佢就話當時邊度有咁多政策，都係自己諗掂佢咋！但就話自己當時係去學校聽講座，先至選擇做護士嘅，當年每個人都係靠自己多啲o架喇。
對於一離開校門就踏足社會嘅畢業生，佢話最慘嘅就係年輕人向上流動機會低。儘管香港嘅生活用品都唔算好貴，收入萬幾、兩萬銀一個月其實好好使，可惜樓價根本就難以負擔，搞到年輕人都好頭痕呀。議員都講到咁，唔知政府會唔會諗諗佢呢？卓妮