中環出更：塗鴉亦是藝術 王嘉恩促推動街頭創作
出色嘅藝術創作，往往出現喺城市街頭。香港國術總會會長王嘉恩（Albert）雖然醉心武術，但早前佢就聯同一班義工，參與旺角警署一幅外牆嘅壁畫創作。佢話香港不妨參照外國嘅做法，予街頭創作更多空間，既為藝術家帶來一展才華嘅機會，又可美化市容咁話。
之不過，喺大街小巷留下筆墨，到底算係壁畫，還是塗鴉呢？Albert認為兩者都屬於一種行為表達，然而塗鴉係小眾嘅行為，不具規模同策劃、講求即興、只求宣洩內心情感，而唔計較公眾如何看待自己嘅作品；至於壁畫，係有計劃有目的、希望成為長時間嘅美術展示，亦會較為考慮公眾嘅觀感。Albert又覺得，無論從事壁畫或塗鴉，其實都係藝術家，所以塗鴉亦可以變成可觀嘅藝術形態，事實上外國嘅塗鴉大師，其街頭創作往往會掀起藝術風潮與流行文化，因此當地嘅政府亦好樂意去推動呢種街頭創作。如果香港都可以將街頭創作規範化，如政府物業或公共設施劃出範圍予藝術家發表作品，就會有更多令人驚艷嘅街頭藝術去粉飾我哋所居住嘅都市空間。
壁畫寓意警民攜手重現繁榮
講番旺角警署呢幅壁畫，策劃人係義工團體「齊心服務香港」召集人歐陽鳳盈。佢話今次嘅壁畫項目籌備經年，製作過程花咗兩個月，期間不但得到旺角警署以及10位壁畫師嘅協助，同時邀請到30多位來自社區以及團體嘅義工參與。至於壁畫嘅內容，係藉住由陰轉晴嘅畫面，寓意警隊同社區攜手，重現香港嘅繁榮安定。
旺角區少年警訊名譽會長會副主席陳香蓮（Jenny），就出席壁畫嘅揭幕儀式。Jenny都好欣賞街頭藝術，話如果可以美化街道同公共空間，實在歡迎之至，不過藝術家發揮本領前宜徵得業權人許可，畢竟要對人家嘅物業予以尊重，同埋唔好觸犯法律。卓妮